Like us on Facebook
Sayana Press
Gwnewch y Newid: O Depo-Provera i Sayana Press
Beth yw Sayana Press?
Mae Sayana Press yn bigiad atal cenhedlu sy'n cynnwys yr hormon medroxyprogesterone acetate, yn union fel Depo-Provera. Ond mae'n cynnig y fantai ychwanegol o hunanweinyddu (self-administration), gan roi mwy o reolaeth i chi dros eich dull atal cenhedlu.
Pam dewis Sayana Press?
- Cyfleustra – Gallwch weinyddu Sayana Press eich hun yng nghysur eich cartref, gan arbed yr amser a'r ymdrech o fynychu apwyntiad bob tri mis am eich pigiad. Byddwn yn rhoi presgripsiwn i chi am 4 pigiad, gan roi cyflenwad blwyddyn gyfan i chi.
- Rheolaeth – Cymerwch reolaeth dros eich iechyd atgenhedlu trwy weinyddu eich dull atal cenhedlu eich hun.
- Preifatrwydd – Mwynhewch y disgresiwn o reoli eich dull atal cenhedlu yn breifat.
- Cymorth – Bydd nyrsys y practis yn dangos i chi sut i weinyddu Sayana Press ac yn goruchwylio eich pigiad cyntaf i sicrhau eich bod yn teimlo'n hyderus ac yn gyfforddus.
Sut mae Sayana Press yn gweithio?
Mae Sayana Press yn atal beichiogrwydd drwy:
- Atal ofyliad (ovulation) – Mae’n stopio wy rhag cael ei ryddhau o'r ofari.
- Tewychu mwcws ceg y groth – Mae’n ei gwneud hi'n anoddach i sberm gyrraedd wy.
- Teneuo leinin y groth – Mae’n lleihau'r siawns o wy sydd wedi'i ffrwythloni yn mewnblannu.
Sut i ddefnyddio Sayana Press?
- Paratoi: Gwnewch yn siŵr bod gennych chi:
- Chwistrellwr Sayana Press
- Gwlân cotwm glân, hances bapur, neu weip antiseptig
- Cynhwysydd (container) ar gyfer y chwistrellwr ar ôl ei ddefnyddio
- Safle’r Pigiad:
- Dewiswch fan ar eich abdomen (bol) neu ran uchaf eich clun blaen
- Osgowch unrhyw greithiau neu groen llidus
- Glanhau'r Ardal:
- Golchwch eich dwylo'n drylwyr
- Glanhewch safle’r pigiad â dŵr neu weips antiseptig
- Chwistrellu:
- Tynnwch y Sayana Press o'i becyn a'i archwilio
- Chwistrellwch ef eich hun gan ddilyn y cyfarwyddiadau a roddir gan nyrsys y practis
- Gwaredu:
- • Dylech gael gwared ar y chwistrellwr ar ôl ei ddefnyddio drwy ei roi mewn cynhwysydd eitemau miniog sydd â chaead porffor. Caiff hwn ei roi i chi gan y fferyllfa pan fyddwch chi'n casglu eich presgripsiwn cyntaf. Pan fydd eich bin eitemau miniog yn llawn, gallwch ei gyfnewid yn y fferyllfa am un newydd.
Pryd i ddefnyddio Sayana Press?
- Newid o Depo-Provera – Gallwch ddefnyddio Sayana Press pan fydd eich pigiad Depo-Provera nesaf yn ddyledus a bydd gennych amddiffyniad atal cenhedlu llawn.
- Defnydd cyntaf:
- Os yw eich pigiad cyntaf o fewn y 5 diwrnod cyntaf o'ch mislif, rydych chi wedi'ch amddiffyn ar unwaith.
- Os yw eich pigiad cyntaf fwy na 5 diwrnod ar ôl dechrau eich mislif, defnyddiwch ddull atal cenhedlu ychwanegol (e.e., condomau) am y 7 diwrnod cyntaf.
Sgileffeithiau posib
Gan fod Sayana Press a Depo-Provera yn cynnwys yr un cynhwysyn gweithredol (active ingredient) , mae ganddyn nhw sgileffeithiau tebyg, gan gynnwys:
- Magu pwysau
- Cur pen
- Newid mewn hwyliau
- Gwaedu neu smotiau afreolaidd
- Adweithiau (reactions) ar safle'r pigiad (cochni, cosi, chwyddo)
Pethau pwysig i’w cofio
- Dylech gael eich pigiad bob 13 wythnos – Os ydych chi'n hwyr, cysylltwch â'r feddygfa am gyngor.
- Mae iechyd esgyrn yn bwysig – Dylech gynnal diet cytbwys sy'n llawn calsiwm, gwneud ymarfer corff yn gyson i osgoi magu pwysau, ac osgoi gormod o alcohol ac ysmygu.
- Ydych chi'n meddwl beichiogi? – Os ydych chi'n bwriadu beichiogi, rhowch y gorau i ddefnyddio Sayana Press. Gallai’r amseroedd y bydd ffrwythlondeb yn dychwelyd amrywio o ychydig fisoedd i flwyddyn, yn union fel gyda Depo-Provera.